Maruta Latkovska
Ir tei myusu Vuolyudzeite, bez gola klauseituo i dzīduotuo...
Mums, latvīšim, ir divejis viesturiski izaveiduojušys rokstu tradicejis, tik tei ūtruo - latgalīšu rokstu volūda - školā vaira nateik vuiceita nu 20.godu symta 30.godu. Na spraunuoki nu ituo teikam, a daklybojam vys cīšuok i cīšuok... i sovā raksteibā mes, latgalīši, vaira kai 99% niu asam analfabeti.
Latgalīšu volūda tautu ir gluobuse i nu puorpūļuošonys, i nu puorsakrīvuošonys. Piec drukys aizlīguma latiņu burtim atceļšonys (1904) da 1940.goda latgaliski izguoja 32 nūsaukumu avīzis, 34 nūsaukumu žurnali i rokstu kruojumi, izguoja romani, stuosti, lugys, dzeja, fabulys. Nu 1768. da 2008.goda izdūta 71 latgalīšu ābece. Kū nu tuo vysa zinim niu, kū lītā līkam?
Politiskūs spieļu rezultatā latgalīšu pošapziņa neidāta godim, jūs volūda - smuodāta i izasmīta. Paļdis Dīvam, piecbarikažu laikā izauguse jauna audze, kura na tik da Krystapiļa, a i Reigys vydā runoj latgaliski, a ar raksteitū vuordu mums īt gryuši. Ir vuiceibu standarts deļ latgalīšu rokstu volūdys i literaturys vuiceišonys, tik voi latgalīšu volūda školā i duorzeņūs ir atsagrīzuse?
