Mīreigū Latvejis vaļsti otkon satrycynova kaids troks latgaliski runojūšs Saeimys deputats. Saeimys prīšksādātuoja tū apsauce par teatri.
Sovā vaļstī runuot dzymtajā volūdā ir teatris? Voi vīna nu cylvāka pamattīseibu? Asu latvīts i runoju latvyski, ari ite raksteitais teksts ir Latvejis vaļsts volūdā pīraksteits - atbylstūši Vaļsts volūdys centra jau 2007. godā apstyprynuotajai kuorteibai. Kam ir gribiešona, var vēļreiz apsavērt i Satversmi, i Vaļsts volūdys lykumu, i Saeimys kuorteibys rytuli - pats jimūs naasu atrads nivīna aizlīguma lītuot Latgolys latvīšu rokstu (literarū) volūdu. Ka es klaidejūs, palobojit mani, bet ar pamatuojumu i atsauci iz konkretu normativūs aktu punktu. Byušu eistyn pateiceigs. Vyss puorejais ir tikai tukšu solmu kuļšona i vacūs laiku aizsprīdumu kuļtiviešona. Na muna vaine, ka latvīšu volūdai ir daudz izlūkšņu, vairuoki dialekti i divejis viesturiski izaveidovušys literaruos tradicejis.
