Ilustrācija — Elvīra Beķere
Žurnāls Domuzīme, 2023, nr. 5
— Pacel! Pacel to malu! Turi! Turi! Ceļam!
— Reize, reize! Raz, dva!
— Pacel augšā! Turi! Laižam!
— Reize! Opa!
Mīsa ar blyukši īsavēle gultā. Obejis sanitarkys až īkryta jai leidza. Izadeve! Dermantina gultu iz ritiņu pastyume nūstyn.
Miļzeigs cics puorsavēle puori plykam i grubuļainam vādaram i puorsleidēja gultys molai. Sīvītei pasagrīžūt, jis īsavylka atpakaļ pi juos gultā. Mīsa kai studiņs īsalēja atpakaļ bļūdā. Jei niu beja pi vītys. Gryuši eļsinēja i jei, i obejis sīvītis kiteļūs.
Lytkys kai bluči, kruosuoti kuoju nogi. Guļūt golvys naredzieju, tik garu dagunu.
Jaunū sakluotū gultu juos beja pastatejušys palatys vydā. Lai cikom kas pastuov ite. Viežineicu tī, pi skapa, šudiņ izroksta, tod stums juos vītā. Kod papeiri byus kuorteibā i veirs atbrauks pakaļ. Lai mierst sātā.
