Danis Platacis
Ka saskaita 100 boltu zyrgu, dreiži bryutgons byus rūkā! A ka saskaita 500 kuozu - kū tod? Muzykantim tys zeimoj, ka dreiži byus 501. i 551. kuozys i dzīsmis da reita gaismys.
Pyrmū reizi kuozuos spielieju 1983.godā, grupys bīdram Viktoram stažs par godi pīci leluoks, a Andrivs ar mums nu 1990.goda. Nūspālāts ap 500 kuozu, ari itys gods na bez jūs, viņ žāļ, ka vysa Latveja gribēja apsaprecēt 21.junī. Dabuojom ap 30 uzaicynuojumu. Daudzi dzeivoj uorzemēs i atbrauc iz Latveju tik apsaprecēt.
Kod klients vaicoj: «Leidz pus Latvejai brauksi?», soku: «Tuoļuok par Kolku nabraucam!» Reizem nūprosa: «A kaidys dzīsmis jius zynit?», «A jius normalu muzyku spielejat?» Tod prosu normalys muzykys definiceju i sarokstu. Kaida kuņdze vaicuoja: «Jius nūsaukumu pajēmet nu tuos glupuos krīvu kinys?» Atsaceju, ka nu Džeroma K. Džeroma romana. Jei beja sajiusmā. Pruotvādarus interesej, kur laiva dasīta, kur suņs? Tod soku: «Laiva ir filosofisks i natverams jiedzīņs, a suņs kotruos kuozuos cyts.»
