Vosora itūgod nabeja taida kai cytim godim - laiskys guliešonys pi azara i lapsiņu apsāsta kompota nasteidzeigys dzeršonys vītā nūtyka kas cyts. Vīnim - pasauļa olimpiade voi pasauļa šovs ar Lady Gaga, cytim - pasauļa latgalīšu saīts Rēzeknē.
Pasauļa latgalīšus (saleidzynojūt ar saītu pyrma 10 voi 20 godu) gon varēja saskaiteit iz vīnys rūkys pierstu. Tik vīta napalīk tukša. Ir izauguse jauna audze, kuruo breineigā kuortā skaita nazcik lelajuos volūduos, sierfoj škārsteiklā i na tik nasakaunej runuot muotis volūdā, bet roksta, spielej teatri, plieš jūkus latgaliski i nūpītnai pietej latgalīšu kulturu, volūdu, medejus.
Ūtrys cereibys īmeslis - gondreiž vysa diveju dīnu konfereņce nūtyka latgaliski. Tai runova i nu Reigys sabraukušī pietnīki i ministri. Tik daudz ministru i Saeimys deputatu Latgolys regionā organizātā konfereņcē nabeja saguojs redzēt.
