Juris Lazdāns
Kod maņ prosa, kas ir patriotisms, es soku: tys, kū es doru. Nabraukt paceli, nasažāluot, bet apstruoduot savu tāvu tāvu zemi Latgolā - varbyut tei ari ir leluokuo patriotisma izpausme. Jau Amerikys prezidents Džons Kenedejs saceja: «Nadūmoj, kū vaļsts tev var dūt, dūmoj, kū tu vari dūt vaļstei.»
Piec taida principa dzeivojam. Kotru godu saražojam ap 150 tonnu gryudu, 70 tonnu pīna i 3 tonnys cyukys galis. Nav daudz, bet nav ari moz.
Augusts lauksaimnīkim ir pats korstuokais laiks. Ituo goda augusts nav izjāmums. Juonūkuļ 50 hektaru labeibys: vysu pyrma zīmys kvīši, tod vosorys mīži, auzys i vosorys kvīši. Tys vyss juoizteirej i juorealizej.
Šūgod loba raža vosoruojim i zuoluojim. Zīmuoju raža gon pīticeiga. Pavasarī pusi zīmuoju dabovom puorsēt, zaudiejumūs nūrokstūt ap 100 eiro iz kotra hektara. Bet laime, ka nabeja kai Zemgalē, kur zīmuojus puorsēja symtprocenteigi!
